Crux meum stemma.
Frustra vetustas cantat origines,
Qui laureatis gaudet honoribus
Patrumque ceris aeviternum
Stemmatibus meditatur aevum.
Frustra tumentes non sine plausibus
Exercet auras, quem super incliti
Jactant in argento triumphi
Laurigera celebrante dextra.
Me nec refuso divitiae sinu,
Nec destinati copia muricis
Ad se retorquet, nec decoro
Nobilitas comitata gressu:
Cui stemma Christi stelligerae Crucis
Vel sole claro clarius eminet,
Aeternitatisque irretorto
Haurit opes sine fraude vultu:
Quod regiarum stemmata frontium
Calcat supremo nominis essedo
Fasces triumphorumque palmas
Et rutili diadema serti.
Crux una regum vertice pulchrior
Laboriosam culmine gloriam
Pulsat, nec imbelles coruscis
Collocat in soliis clientes.