Las ? si nostre non estre aveugles miserables
Aus siecles ja passez sans douleur à esté,
Cest estre est au contraire à toute heure agité
De regrets, de soucis, & de pleurs lamentables :
Qui causera des deus nos peines dommageables
Ou bien nostre non estre, ou la varieté
De cest estre present, qui de crainte hebeté
Mesme à nous mesmes rend nos iours desagreables :
Celuy vrayment est sot, qui d'ardeur tourmenté
Retournant en vigueur, accuse sa santé
De sa peine derniere, & non sa fiebvre enclose :
Nous condamnons la mort & ne serions vaincus
De son trait importun, si nous n'avions vescus,
La Vie, & non la mort de nos maus est la cause.