L'emplastre de nonchaloir,
Que sus mon cueur pieca mis,
M'a guéri, pour dire voir,
Si nectement que je suis
En bon point, ne je ne puis
Plus avoir, jour de ma vie,
L'amoureuse maladie.
Si font mes yeulx leur povoir
D'espier par le pays,
S'ilz pourroyent plus veoir
Plaisant beaulté, qui jadis
Fut l'un de mes ennemis,
Et mist, en ma compaignie,
L'amoureuse maladie.
Mes yeux tense main et soir,
Mais ilz sont si tres hastis,
Et trop plains de leur vouloir;
Au fort, je les metz au pis,
Facent selon leur advis;
Plus ne crains, dont Dieu mercie,
L'amoureuse maladie.
L'ENVOY.
Quant je voy en doleur pris
Les amoureux, je m'en ris;
Car je tiens, pour grant folie,
L'amoureuse maladie.