Balades, chancons et complaintes
Sont pour moy mises en oubly,
Car ennuy et pensées maintes
M'ont tenu longtemps endormy;
Non pourtant, pour passer soussy,
Essayer vueil se je sauroye
Rimer, ainsi que je souloye,
Au moins j'en feray mon povoir,
Combien que je congnois et scay
Que mon langaige trouveray
Tout enroillié de nonchaloir.
Plaisans parolles sont estaintes
En moy qui deviens rassoty;
Au fort, je vendray aux actaintes,
Quant beau parler m'aura failly;
Pourquoy pry ceulx qui m'ont oy
Langaigier, quant pieca j'estoye
Jeune, nouvel et plain de joye,
Que vueillent excusé m'avoir;
Oncques mais je ne me trouvay
Si rude, car je suis, pour vray,
Tout enroillié de nonchaloir.
Amoureux ont parolles paintes,
Et langaige frais et joly;
Plaisance dont ilz sont acointes
Parle pour eulx; en ce party
J'ay esté, or n'est plus ainsy;
Alors, de beau parler trouvoye
A bon marchié, tant que vouloye;
Si ay despendu mon savoir,
Et s'ung peu espargné en ay,
Il est, quant vendra à l'essay,
Tout enroillié de nonchaloir.
L'ENVOY.
Mon Jubile faire devroye,
Mais on diroit que me rendroye
Sans cop ferir, car Bon espoir
M'a dist que renouvelleray;
Pour ce, mon cueur fourbir feray
Tout enroillié de nonchaloir.