Auitianus hatte sū hetol ealdor-man · 1143
ƿæl-hreoƿ on his ƿeorcū · se ge-ƿrað fela manna ·
⁊ on racenteagū gebrohte to þære byrig turonia
ƿolde hí þæs on mergen mislice acƿellan
ætforan þære burhƿare · þa ƿearð hit þā bisceope cuð ·
Þa smeade se halga ƿer hu he heora gehelpan mihte · 1148
⁊ eode to middre nihte ana to his gatū ·
⁊ þa þa he inn ne mihte · he anbidode þærute ·
Ƿearð þa se ealdor-man aƿreht færlice þurh godes engel · 1151
⁊ he hī grālice to cƿ̅ ·
List ðu ⁊ rest þe 1152
⁊ godes þeoƿa lið æt þinum gatum ·
⁊ he arás þa afyrht · ⁊ cƿ̅ to his mannū ·
þæt martinus ƿære | ƿið-utan his gatū ·
⁊ het hí gán to · ⁊ undón þa gata ·
þæt se godes þeoƿa sƿylcne teonan leng ne þolode ·
Hi eodon þa út to þam inran gæte · 1158
⁊ sædon heora hlaforde þæt hi þær nænne ne ge-saƿon ·
⁊ cƿædon þæt he sceolde on slæpe beon bepæht ·
Auitian᷒ þa eode eft to his bedde · 1161
⁊ ƿearð eft of slæpe egeslice aƿreht ·
⁊ hrymde to his mannū cƿ̅ þæt martin᷒ stode
æt-foran his gatū · ⁊ forðy ne moste
nane reste habban ne modes ne lichaman ·
Hi þa git elcodon · ac he eode sylf 1166
to þā yttran gete · ⁊ efne he gemette
martinū þærute sƿa hī gesƿutelod ƿæs ·
He ƿearð þa ablicged · ⁊ to þam halgan ƿere cƿ̅ · 1169
Hƿæt la leof hlaford · hƿi dest þu sƿa? [sic @ Skeat] 1170
Ne þearft þu nan ƿord cƿæþan · ne nanes þinges biddan · 1171
ic ƿat hƿæs þu ge-ƿilnast · ac geƿend þe nu ham ·
þe-læs-þe godes yrre for þinū teonan me fordó ·
Se halga ƿer þa ham ge-ƿende sona · 1174
⁊ se ealdor-man het on þære ylcan nihte
lætan ealle aƿeg · þa þa he ƿolde acƿellan ·
⁊ he sylf ferde afyrht of þære byrig ·