Eft on sumere ƿic ðe ƿæs librosum ge-haten · 0439
ƿolde se halga martinus to-ƿurpan an templ
þæt ƿæs þearle ƿelig hus ge-ƿurðod þam deoflum
þa forƿyrndon þa hæþenan þā halgan ƿere þæs ·
⁊ hine adræfdon ge-drefedne þanon ·
Þa ferde martin᷒ na sƿyðe feor þanon 0444
⁊ scrydde hine mid hæran ⁊ mid axan bestreoƿode
fæstende þry dagas · ⁊ his drihten bæd ·
þæt he mid heofon-licre mihte þæt hæðene templ
þa þa he mid his cræfte hit to-cƿysan ne mihte ·
Æfter ðam fæstene hī comon færlice to 0449
tƿegen scinende englas · mid sperū ⁊ scyldū ·
sƿilce on gelicnysse heofonlices ƿerodes ·
secgende þam halgan þæt se hælend hi sende
þæt hí þæt cyrlisce folc afligan sceoldon ·
⁊ martine fultumian þæt hi ne mihton ƿið-standan ·
Martin᷒ þa ferde to þære fore-sædan deofol-gilde · 0455
⁊ mid þæra engla fultume mannū onlocigendū
þæt tempel eall to-ƿearp · ⁊ þa ƿeofode to duste ·
ealle þa anlicnyssa heora arƿurðra goda ·
Þa ne mihton þa hæðenan martine ƿið-cƿeðan · 0459
ac þurh þa god-cundan mihte micclū ƿurdon afyrhte ·
⁊ gelyfdon on god · mid ge-leafan clypigende ·
þæt se god ƿære to ƿurþigenne þe se halga ƿer bodode ·
⁊ heora godas to forlætenne þe him fremion ne mihton ·