Martinvs se mara bisceop ƿæs geboren on þā fæstene 0010
sabaria gehaten pannoniscre scire ·
⁊ on ticinis he ƿæs afed italian landes ·
He cō of hæðenū magum æþelborenū sƿaðeah 0013
of ƿurðfulre mægðe · æft̅ ƿoruld-þingum ·
his fæder ƿæs ærest cempa · ⁊ eft cēpena ealdor ·
⁊ martin᷒ ƿæs geƿenod to ƿæpnum frā cild-hade ·
⁊ camp-dome fyligde betƿux laricū gefylcū ·
ærest under constantine þā æþelan casere ·
⁊ eft under iuliane þā arleasan ƿiðer-sacan ·
na sƿaþeah sylf-ƿilles · forþan þe he frā cild-hade ƿæs sƿyðor
onbryrd þurh god to godcundlicū þeoƿ-dome ·
þonne to ƿoruldlicū campdome · sƿa sƿa he cydde syððan ·
Þa ða he ƿæs tyn ƿyntra þa ƿearð he gecristnod 0023
his maga unþances · ⁊ on ƿundorlicum gemete
sona to godes þeoƿdome he ƿæs eall gehƿyrfed ·
⁊ þa þe he ƿæs tƿelf ƿintra he ge-ƿilnode to ƿestene ·
⁊ he hit eac gefremode gif he þa ylde hæfde ·
His mod ƿæs sƿa-þeah æfre embe mynstru smeagende · 0028
oþþe embe cyrcan · ⁊ godes gesetnyssum ·
he smeade þa on cild-hade · þæt he siððan gefremode ·
Þa ƿæs þære casere (sic) bebod | þæt þæra cempena suna 0031
þe ƿæron forealdode ƿurdon genamode
to þā ylcan camp-dome þe heora fæderas on ƿæron ·
⁊ martin᷒ þa ƿearð ameldod frā his fæder ·
þe on his ƿeorcū andode · ⁊ he ƿearð geracenteagod
þa þa he fiftyne ƿintre ƿæs · betæht to þam geƿinne
mid anū his þeoƿan þe his gesiðe ƿæs ·
þā he sylf þenode · sƿiþor þonne he hī ·
⁊ samod hi gereordoden sƿa sƿa gelícan ·
þreo gear he ferde mid þā folclicum cempum ·
buton geƿæpnunge ærþan þe he ƿære gefullod
ungeƿemmed sƿa-þeah frā ƿoruldlicre besmitennysse
on þære þe mennisc cynn micclum on syngað ·
Ēbe his efen-cempan he hæfde ƿel-ƿillendnysse · 0044
⁊ micele lufe · ⁊ gemetfæst geðyld ·
⁊ soðe eadmodnysse · ofer mennisc gemett ·
Sƿa micele forhæfednysse he hæfde on his bigleofan · 0047
sƿilce he munuc ƿære sƿiðor þonne cempa ·
⁊ for his æðelū þeaƿū his efen-cempan ealle
þa hine arƿurðodon mid ƿundor-licre lufe ·
He næs þa git gefullod · ac he gefylde sƿa-þeah 0051
þæs fulluhtes dæda mid fulfremedū ƿeorcū ·
sƿa þæt he sƿincendū fylste · ⁊ fedde þearfende ·
⁊ nacode scrydde · ⁊ nan þing hī sylfū
of his campdomes scipe on his seode ne heold ·
buton þæt he dæg-hƿālice to bigleofan hæfde ·
sƿa sƿa þæt god-spel sægð ·
Ne þenc þu be mergene · 0057