Wúnschent dc min núwes werben·
bas volende danne dc alte habe getan·
alder ich mv̊s an froͤiden sterben·
sit ich herzelieb alrerst vunden han·
ich wc vri nv hat min herze sich ergeben·
in der dienste ich mv̊s ersterben·
eines wibes der ich mv̊s vúr eigen leben·
Sol mir iemer wol gelingen·
sol mir iemer herze swere werden bůs·
nein ich bin von lieben dingen·
so verderbet dc ich lange truren mv̊z·
dar zů trurent kleinú vogellin
wer moͤhte vns nv froͤide bringen·
mir ein wib vnd in des liehten meien schin·
We wer wil nv sorgen walten·
dv́ wc min gesinde nv vil manigen tag·
ine wil ir niht me gehalten·
ich bin vro dc ich ir ane wesen mag·
froͤide hat si mir gedrungen an dc ort·
helfent mir si gar verschalten·
sprechent ia núwan dc eine svͤze wort·