Wol mich húte wol mich iemer mere·
mich tůt so wunnenrich ein wib·
des wol mich dc sich al min froͤide mere·
wol mich dc ich so lieben lib
han zetroste mir ersehen·
wer ich tvsent iar gewaltig keiser·
mir kvnde niemer bas beschehen·
Min lieber wan der half ie vil kleine·
wan dc ich hoffet alle tage·
si hies mich dike vro sin durh gemeine·
un̄ lies mich leit mit willen tragen·
in dem wane lebt ich do·
von dem wane hat si mich gescheiden·
vnd bin von schulden vro·