Wol mich hút· vnd iemer me· ich sah ein wip
der ir munt von roͤte bꝛan sam ein fúr in zunder·
ir wol trútelechter minneklicher lip·
het mich in den kvmber bꝛacht· von der minne ein wunder·
Wunder· an ir schoͤne hat got nit vergessen·
ist es recht als ich es han gemessen·
so hat si einen roten roten gessen·
So ist der eine der des nit were wert
das 44v das er leg vf reinem strǒ· der trút ir wiplich bilde
so ist der ander der des todes dvr si gert·
vnd zv̊tz zallen marsen vert· dem můs si wesen wilde·
heýa got wie teilst so vngenliche·
ist er hesssúlich·
so ist si minnenkliche·
was solt der túvel· vf das himilriche·
Herre got vnd het ich von dir den gewalt·
das ich moͤcht verstossen in von der grossen wunne·
So moͤcht ich in gantzen froͤiden werden alt·
helfent alle bitten mir got das ers mirs gunne·
das der selbe túvel wert gelêtzet·
vnd ich wert an sine stat gesetzet·
so bin ich mis leides wol vrgetzet·