Wol mich das dv́ vil seldenriche ie wart geborn·
dú mit berenden tugenden hat ir lip so wol gekroͤnet·
si ist min blvͤnde rose gewahsen svnder dorn·
seht von ir schoͤne weren vil wol drissec lant beschoͤnet·
si svnnenblik si meien schin·
si vogel sanc min hohster trost in svͤsser ǒgenweide·
si erlúhtet gar dc herze min·
swa ich der lande bin si ist doch min zv̊uersiht in leide·
ia ist si lobes krone ob aller frowen schar·
ir lop sich helle swinget witen her vnd dar·
von ir tvgenden die sint also lobelich·
swa mit man kroͤnet vrowen lip· des weis ich niender ir gelich·