Wol dir svmer wie dv herest·
heide vnd ǒch den gruͤnen walt·
wie du kleinen voglin merest·
hohe ir stimme manicvalt·
da von git dir froͤide ir singen·
vf dem berge vnd in dem tal·
swa man sv̊sse hoͤre erklingen·
ir vil wunneklichen schal·
Wenne sol ein lieblich grvͤssen·
mir vil senden werden kvnt·
von ir dú mir swere bvͤssen·
mag vnd ir vil roter mvnt·
mir kan nieman truren swenden·
wan ir liehter munt vil rot·
ir trost mv̊s mir helfe senden·
alde ich stirbe in sender not·
Swie dú welt an froͤiden swache·
doch mag ich der frowen min·
niht vergessen swie si mache·
dc ich mv̊s in sorgen sin·
wenne wil si trost erzeigen·
mir genadelosen man·
danne wolt ich truren neigen·
des ich leider svs niht kan·