Wol becleidet ſtet dú heide·
ang̾ vn̄ der gruͤne walt·
bi d̾ liehtē ǒgenweide·
hoͤꝛt man ſtīme manigvalt·
in den owē vogelin doͤne·
meie wart noch nie ſo ſchoͤne·
den ich mit geſāge· kroͤne·
noch ſo rehte wol geſtalt·
Frowe ſich
du ſolt mich
troͤſte ſit ich minne dich·
Sich froͤit al dv́ w̾lt gemeine·
gegē der wūnklichē zit
niemā truret wā ich eine·
ſit ſi mir niht froͤide git·
der ich diene ī ganzē trúwē·
dú wil minē kvmber nivwē·
ich lebe ī vil ſtarkē rúwē·
vō den merē iem̾ ſit·
Frowe ſich
du ſolt mich
troͤſte ſit ich minne dich·
Ane got ſo hat min niemā·
dē gewalt als ſi wol hat
itwiſet mich des ieman·
92r ſtuͤnde es dem als eſ mir ſtat·
er gelǒpte mir zware
d̾ ich diene ſvnderbare·
wie dv́ miner ivngē iare·
froͤide nider ſigē lat·
Frowe ſich
du ſolt mich
troͤſte ſit ich minne dich·
Wer geſach ie creatúre·
die mā weis in wibes namē·
alſo ſchone alſo gehúre·
dú darf ſich des niht beſchamē·
alſo kúſche vn̄ alſo gv̊te·
alſo tvgēthaft ī mv̊te
vn̄ an erē ſo behv̊te·
dú iſt ein ſelig wib benamē·
Frowe ſich
du ſolt mich
troͤſte ſit ich minne dich·