Wisset vrǒwe wol getan·
dc ich vf genade han·
herze vnd lip an úch verlan·
dc riet mir ein lieber wan·
dvrh des rat han ichs getan·
vnd wil es niht abe gestan·
dc lat mir ze gv̊t ergan·
Sit ir dienstes mir bereit·
tv̊t ir das vf lones reht·
so lat mich erkennen dc·
wie der dienst si gestalt·
den ich mich sol nemen an·
wie der lon geheissen si·
der iv von mir sol geschehen·
Frǒwe ich wil in minen tagen·
so nach úwern hvlden iagen·
dc es ú wol mv̊s behagen·
den mv̊t dvrh úch hohe tragen·
vnd an froͤiden niht verzagen·
úwer lob der werlte sagen·
vnd des lones noh gedagen·
Sit ir vro dar zv̊ gemeit·
mir zedienste als ir ieht·
es gefrvmt úch selben bas·
danne mich wol tvsent valt·
tůt dc scham lob hin dan·
mir ist der spiegel swere bi·
dar inne ich min leit sol sehen·
Ivwer lop die wirde hat·
dc es wol zehove gat·
bas danne alle kúnige wat·
ane scham al da bestat·
lieber herre selig man·
ir sit spotes al ze vri·
dc ist vnpris tar ichs geiehen·