Wir svn den winder·
die stuben enpfahen·
wol vf ir kinder·
ze tanze svn wir gahen·
volgent ir mir·
so svn wir smieren·
vnd zwinggen vnd zwieren
nach lieplicher gir·
Schone vmbe sliffen·
vnd doch mit gedrange·
breste vns der pfifen·
so vahen ze sange·
respen den swanz·
so svn wir ruken·
vnd zoken vnd zvken·
das eret den tanz·
Nieman verliese·
siner froͤiden gewinne·
ieder man kiese·
sin trut dc er minne·
sanfte dc tůt·
swie si da wenke·
so trefes ans gelenke·
das kúzelt den mv̊t·
Nieman sol stoͤren·
die minne vs dem mv̊te·
er wil si toͤren·
si wehset von hv̊te·
liep ane wanc·
swie si doch smvket·
si luͤdert si luket·
ir frúndes gedanc·
Froͤide vns behvͤte·
vor sorklichen dingen·
lant slichen ze gemvͤte·
dc gevider zerswingen·
nieman sol toben·
wenket si dike·
die smierenden blike·
das reizet den kloben·