Wir ſvn den winder·
die ſtubē enpfahen·
wol vf ir kinder·
ze tanze ſvn wir gahen·
volgent ir mir·
ſo ſvn wir ſmieren·
vn̄ zwinggen vn̄ zwieren
nach lieplicher gir·
Schone vmbe ſliffen·
vn̄ doch mit gedꝛange·
bꝛeſte vns der pfifen·
ſo vahen ze ſange·
reſpen den ſwanz·
ſo ſvn wir ruken·
vn̄ zoken vn̄ zvken·
daſ eret den tanz·
Nieman v̾lieſe·
ſiner froͤidē gewīne·
ieder man kieſe·
ſin trut dc er mīne·
ſanfte dc tůt·
ſwie ſi da wenke·
ſo trefeſ ans gelenke·
das kúzelt dē mv̊t·
Nieman ſol ſtoͤꝛen·
die mīne vs dem mv̊te·
er wil ſi toͤꝛen·
ſi wehſet von hv̊te·
liep ane wanc·
ſwie ſi doch ſmvket·
ſi luͤdert ſi luket·
ir frúndeſ gedanc·
Froͤide vns behvͤte·
voꝛ ſoꝛklichen dingen·
lant ſlichen ze gemvͤte·
dc gevider zerſwingē·
nieman ſol toben·
wenket ſi dike·
die ſmierenden blike·
das reizet den kloben·