Wie sol man gewarten dir·
welt wildiv also winden dich·
wenest dich entwinden mir·
nein ich kan ǒch winden mich·
dv wilt sere gahen·
vnd ist ǒch vnnahen·
dc ich dir noch svle versmahen·
Dv hast lieber dinge vil·
der mir eines werden sol·
welt wie ich dc verdienen wil·
doch solt dv gedenken wol·
ob ich ie getrete·
fůs von miner stete·
sit dv mich dir dienen bete·
Welt dv solt niht vmbe dc·
zv̊rnen das ich lones nam·
troͤste mich ein wenic bas·
sich mich minneklichen an·
dv maht mich wol pfenden·
vnd min heil erwenden·
dc stet frowe in dinen henden·
Ich enweis wie din wille ste·
wider mich der mine ist gv̊t·
wider dich wc wildvs me·
welt von mir wan hohen mv̊t·
wilt dv besser wunne·
danne man dir gvnne·
froͤide vnd der gehelfen kvnne·
Welt tv̊ me des ich dich bitte·
volge wiser lúte tvgent·
dv verderbest dich da mitte·
wilt dv minnen toren ivgent·
bitte die alten ere·
dc si wider kere·
vnd aber din gesinde lere·