Wie hohes mv̊tes iſt ein man·
d̾ ſich zv̊ h̾zeklichē liebe ſchoͤnē libe hat geleit·
zer froͤide ich niht gelichē kan·
mir iſt ellú froͤide gar ein niht gegē dirre ſwaſ mir ieman ſeit·
ſw̾ ſich ſo wūneklich̾ wūne wol fúr war gefrowē mag·
d̾ hat die naht niht angeſt wā dc in v̾tribē ſol d̾ tag·
Geſelleklicher vmbevang·
mit blankē armē ſvnder wan tůt ſendeſ h̾ze hohgemv̊t·
da wirt dc vngemvͤte krank·
ſwa mīneklich̾ mīne kvs ſo lieblich lieb an ander tv̊t·
Sw̾ ſich ſo wūneklich̾ wūne wol fúr war gefrowē mag·
d̾ hat die naht niht angeſt wā dc in v̾tribē ſol d̾ tag·
Der tag mich leider hat betaget·
ſo ſeltē nach der erē ſige dc ich niht froͤide mag v̾iehen·
vil ſelig mā der des niht klaget·
vn̄ im ſin h̾ze mag geſagen was im zeleide iſt geſchehen·
Swer ſich ſo wūneklich̾ wūne wol fúr war gefrowē mag·
d̾ hat die naht niht angeſt wā dc in v̾tribē ſol d̾ tag·
Der ſvͤze wehſel vnd̾ zwein·
dē w̾dú mīne fuͤgen kan wie ruket d̾ daſ h̾ze enboꝛ·
dú beide ir mv̊teſ ſint allein·
ich kan nah wūſche erdenkē niht zer w̾lte ſeldē dirre voꝛ·
Swer ſich ſo wūneklich̾ wūne wol fúr war gefrowē mag·
d̾ hat die naht niht angeſt wā dc in v̾tribē ſol d̾ tag·
Der tag wil ſcheidē ritt̾ w̾t·
vō liebe lieb es mv̊s eht ſin· wol vf laze ir dc h̾ze hie·
dú din zefroͤide hat gegert·
ſi wil ǒch dir dc herze lan dú trúwen dir gewākte nie·
dv leiſt ǒch ir als es dī w̾der lip vil wol geleiſtē mag·
mit ſchiere komene es mag niht leng̾ hie geſin ich ſihe den tag·