Wichet vmbe balde ſoꝛge vn̄ angeſt vō der ſtrâſſe·
lat die wūneb̾nde froͤide fúr·
es enzimt ú beidē vf min trúwe niht zemâſſe·
ſwa ir mit ir dꝛinget an der túr·
ſtrichet vō dem lande ſam der erre winder vō vns hin·
lant die froͤide mit dem ſvmer ſin·
Hoher mv̊t iſt her geweſē vō vns hart ellende·
wol vns dc er iſt nv wider komē·
nv ſol vnſer ſwacheſ trvren habē ein ende·
ſit vns ſoꝛge vn̄ angeſt iſt benomē·
ſwer nv truret d̾ iſt v̾zaget an gv̊tē dingē gar·
wúnſchet dc er niemer wol gevar·
Niemā kan mit trurē ſiner not niht vber windē·
da vō wil ich hohes mvͤtes ſin·
man mv̊s mich ī hohē mv̊te vn̄ ouch bi froͤidē vinden·
alſo wil dc ſpilnde h̾ze min·
mir geſtv̊nt der mv̊t ſo ho nie bi miner zit·
wol ir dú mir hohgemvͤte git·
Das iſt ein wib dú wol mit tvgēden kan ir wipheit kroͤnē·
ir wiplich̾ mv̊t iſt wandels vꝛi·
ich geſach nie wibes lip ſo gv̊ten noh ſo ſchoͤnē·
ir iſt reine wibes fůre bi·
ſi iſt ein vꝛǒwe vō gebvrt ſo iſt ir ſvͤſſer lip·
vō ir tvgendē ein vil wiblich wib·
Swer ir reinē ſvͤſſen lip mit minen 243r ǒgen ſehe·
den lîeſſe ich ſi ſo lieblich ſchone ſehen·
dc er ir voꝛ allen wiben hoher eren iehe·
kvnde er als ich wibes tvgēde ſpehen·
ſo mvͤſ er vō warheit ſpꝛechē ſeht dc iſt ein wib·
der vō rehte dienet ritters lib·