West ich wa man froͤide enpflege·
dar wolte ich ine mac niht sus geleben·
dc mir truren gar gelege·
dem wolt ich vil schiere ein ende geben·
sol min froͤide also zergan·
sone gebe ich niht darvmbe swas ich her gelebet han·
Nieman frage mir ze leide·
wes min tvmbes herze froͤwe sich·
wil er das ichs ime bescheide·
schone vnd minnekliche dc tůn ich·
mir ist liebes niht geschen·
ich dinge aber ob ich es verdiene es mv́ge mir wol ergen·
Ich was ie vil ringes mv̊tes·
vnz ich eines wibes rede vernam·
si gehies mir vil des gůtes·
dc ich valschen dingen were gram·
nv wenet si mich han betrǒgen·
nv lône ir got ich bin von ir genaden wol gezogen·
Die ich so herzeklichen meine·
dú ist an guͤte ein vserwelter lib·
si ist es div svͤsse reine·
dú mich troͤsten mac súr ellú wib·
wa fvnde ich dú mir so wol
geviele an allen dingen niemer ich si vinden sol·
Wir svln alle frowen eren·
vmb ir guͤte vnd iemer sprechen wol·
vnd ir froͤide gerne meren·
nieman êrte si ze rehte ie vol·
elliv froͤide vns von in kvmt·
vnd alder werlte hort vns ân ir trost ze nihte frumt·
Wil aber ieman gůter lâchen·
der so wunneklichen si gemv̊t·
der vns kvnde fro gemachen·
dem vergultes got vnd were gůt·
ê dc ich die lenge also·
mit sorgen lebt ich sturbe gerner danne ich were vnfro·