We warvmbe trurent sie·
die bi liebe habent gelegen·
ia vroͤwe ich mich vnd ich doch nie·
lieb gewan noh solhen segen·
den lieb nah leide tůnt mit senden sorgen·
so si scheident sich·
so slaf aber ich vnz an den morgen·
dc nieman sprichet frúnt got segen dich·
Frowen diene ich vnverzaget·
owe torst ich lones gern·
ia fúrhte ich ob si mir versaget·
dc ich mvͤsse ir hvlde enbern·
ir frúntschaft wil ich gerne also behalden·
danne ich hete ir has·
des mv̊s ich iemerlichen alden·
ia en dien ich vmbe dc·
Was hilfet dc ich kriege dar·
vnd krenke minen lib·
si nimt min alzeklene war·
dú mir ist vúr ellú wib·
meinet 161v min frowe als ich si meine·
so wirt min gůt rat·
min dienest dvnket si zekleine·
da setze ich gv̊ten willen fúr die tat·