Wvas ist fúr das truren gůt· das wib nach liebem manne hat·
gerne das min herze erkande wan es so betwungen stat·
also redte ein frǒwe geneme·
vil wol ichs an ein ende keme
enwer dú hv̊te·
selten sin vergessen wirt in minem mvͤte·
Genv̊ge iehent dc grôsse stete· si der besten frǒwen trost·
des enmag ich niht gelǒben sit min herze ist vnerlost·
also zwei geliebe sprachen·
do si von ein ander mv̊sten gahen·
owe minne·
der din ane moͤhte sin das weren sinne·
So al dú werlt růwe hat der mv̊s ich eine wesen fri·
dc kvmt von einer frǒwen schoͤne der ich gerne were bi·
an der al min froͤide beliben
mv̊s vor allen werden wiben·
vf der erden·
wes lie si got mir armen man zekale werden·