Was ie gesang Reinmar vnd der von Eschilbach·
was ie gesprach
der von der vogelweide·
mit zo uer goltem kleide·
ich vrǒwen lob ver gult ir sang als ich úch bescheide·
sú hant gesvngen von dúm feim den grunt hant sv́ verlassen·
vs kessels grvnt· gat min kvnst so giht min mvnt·
ich tůn v́ch kvnt·
mit worten vnd mit toͤnen·
gar ane sunder hoͤnen·
noch soͤlte man miner sanges schrin· gar rilichen kroͤnen·
si hant gevarn den smalen stig bi kv́nsterichen strâssen·
wer ie gesang· vnd singet noch·
bi gruͤnem holtz ein fules bloch
so bin ichs doch
ir meister noch·
der sinne trag ich ǒch ein ioch·
dar zv̊ bin ich der kv́nst ein koch·
min wort min doͤne· getraten nie vs rechter sinne sâssen·