Was hat dú welt zegebenne me·
da von ein sendú not zerge·
danne wibes minne aleine·
ein wib dú loslich lachen kan·
gen einem wol gemv̊ten man·
der froͤiden ist niht kleine·
swenne si stet gegen im ze angesiht·
vnd si in mit ir ǒgen giht·
dc si in von herzen meine·
swer disen zwein geverig si·
vnd wone mit valscher hv̊te bi·
der werde zeinem steine·
AN schonem libe wol gevar·
in edelem můte reine gar·
swer das an wiben vinde·
der lobe ir leben vnd ere ir lip·
si ist gar ein reine selig wib·
des wunsches ingesinde·
ir luter spiegel varwes leben·
kan truͤben herzen froͤide geben
swer sich des wider winde·
der frowen rehte froͤide wer·
versigeln mvͤsse er vf dc mer·
von wibe vnd ǒch von kinde·
IR zuht vlieher úch si geseit·
dc zuht vil verre nah ú ieit·
des swer ich ú bi eide·
mit vnzuht habt ir gůten zúh·
hey͗ zuht flieher nv flúh nv flúh·
so seit man von úch beide·
ir frowen nemt sin kleine war·
er kom mit gůten zúhten dar·
so dc er sich gescheide·
von unzuht als ein zúhtig man·
swelh frowe im danne ir grůsses gan·
der lept gar sunder leide·