Warnet úch gar ivnge vn̄ alde·
gegē dem winder· des iſt zit·
nieman blôſſer voꝛ im halde·
er ſleht tiefe wundē wit·
lant die ſchilde· ſtille ligē·
ſit iv ſelben kleider milde·
ſo mvget ir im angeſigen·
Ich wil úch des beſtē wiſen·
welt ir voꝛ im ſin behv̊t·
ſo ſvlt ir dú húſer ſpiſē·
gegē im iſt iv niht ſo gv̊t·
ſwer mit witzē· nv niht v̾t·
ſit er wil dú hvs beſitzen·
der iſt voꝛ im vnernert·
Fv́r ſin ſtúrmē fúr ſin ſlichē·
fúr ſin vngefůge dꝛo·
ſvln wir in die ſtubē wichē·
da mit wiben weſen fro·
wibes gvͤte· dú iſt ein dach·
dc man nie fúr vngemvͤte·
alſo gv̊tes niht geſach·
Aller gv̊ten wibē guͤte·
mvͤſſe iem̾ froͤiden pflegen·
voꝛ ir zúrnen mich behvͤte·
got· daſt min moꝛgē ſegen·
gv̊teſ wibes· werdekeit·
iſt fúr war gar mines libes·
hoͤſter troſt fúr ſendú leit·
Mines h̾zen froͤiden lere·
iſt ein ſvͤſſer wibeſ lip·
dú iſt min troſt fúr h̾zeſere·
ſi iſt fúr war ein wiblich wib·
vn̄ ein frowe· maniger tvgent·
ſwen ich in ir ougen ſchǒwe·
mich ſo blvͤt mir froͤidē ivgent·