Wan ſol ſich gegen dem tage geſten·
ſwa lieb bi liebe tǒgen lit·
ich ſihe durh dú wolhen gleſtē·
nv wiſſet frowe eſt an der zit·
div naht iſt gar da hin geſcheidē·
ich rate úchs an den trúwē beiden·
dc úwer frúnt vō hinnē var·
Ein ſchoͤne frowe klagelichē·
mit ſoꝛgen zir geſellē ſpꝛach·
owe vnſ wil dú naht entwichē·
nv weis ich wol das nie geſchach·
leit alſo gros mir ſendē wibe·
ſcheide ich vō dinem w̾den libe·
ſo wird ich aller froͤidē blos·
Der ritter an der ſelbē ſtvnde·
die frowē zv̊ zim gevie·
gvͤtlich er ir danken begvnde·
dc ſi in vnſanfte vō ir lie·
ſi ſpꝛach dv haſt· vnfroͤide mir gemeret·
ein leit min h̾ze gar v̾ſeret·
dc dv hin verſt vn̄ mich hie laſt·