Wan sol sich gegen dem tage gesten·
swa lieb bi liebe tǒgen lit·
ich sihe durh dú wolhen glesten·
nv wisset frowe est an der zit·
div naht ist gar da hin gescheiden·
ich rate úchs an den trúwen beiden·
dc úwer frúnt von hinnen var·
Ein schoͤne frowe klagelichen·
mit sorgen zir gesellen sprach·
owe vns wil dú naht entwichen·
nv weis ich wol das nie geschach·
leit also gros mir sendem wibe·
scheide ich von dinem werden libe·
so wird ich aller froͤiden blos·
Der ritter an der selben stvnde·
die frowen zv̊ zim gevie·
gvͤtlich er ir danken begvnde·
dc si in vnsanfte von ir lie·
si sprach dv hast· vnfroͤide mir gemeret·
ein leit min herze gar verseret·
dc dv hin verst vnd mich hie last·