Vns ist komen dú zit·
dú vns froͤide wil bringen·
der svmer mit siner kraft·
dien vogellin er git·
dc in wil suͤsse erklingen·
ir sang mit meisterschaft·
nv svnge ich vil gerne·
vnd hulse es mih iht·
wol zehen verne·
den kvmber ich lerne·
swas mir von der lieben geschiht·
Min herze hat not·
swie fro ich gebare·
nach liebe nv manigen tag·
ir mvnt rosen rot·
der schaffet ze waren·
dc ich vergessen niht mag
ir gv̊t gebaren·
ir lip wol gestalt·
die kvnnen min varen·
vnd sol es veriaren·
min sorge wirt manicvalt·
Ach solte ich geleben·
dc mir dú vil gv̊te·
von sorgen wolte scheiden den lib·
si mehte mir geben·
wol vil froͤide in dem mv̊te·
die hat si selig wib·
ir lieblich lachen·
ir wol stender mvnt·
die wellent mir machen·
mit froͤlichen sachen·
dc ich bin iemer me gesvnt·