Vns iſt komen dú zit·
dú vnſ froͤide wil bꝛingen·
der ſvmer mit ſiner kraft·
dien vogellin er git·
dc in wil ſuͤſſe erklingen·
ir ſang mit meiſt̾ſchaft·
nv ſvnge ich vil gerne·
vn̄ hulſe es mih iht·
wol zehē verne·
dē kvmb̾ ich lerne·
ſwas mir vō der liebē geſchiht·
Min h̾ze hat not·
ſwie fro ich gebare·
nach liebe nv manigē tag·
ir mvnt roſen rot·
der ſchaffet ze warē·
dc ich v̾geſſen niht mag
ir gv̊t gebarē·
ir lip wol geſtalt·
die kvnnē min varen·
vn̄ ſol es v̾iaren·
min ſoꝛge wirt manicvalt·
Ach ſolte ich geleben·
dc mir dú vil gv̊te·
vō ſoꝛgen wolte ſcheiden dē lib·
ſi mehte mir geben·
wol vil froͤide in dē mv̊te·
die hat ſi ſelig wib·
ir lieblich lachen·
ir wol ſtender mvnt·
die wellent mir machē·
mit froͤlichen ſachē·
dc ich bin iemer me geſvnt·