Vngelich ſtet vns der mv̊t·
mir vn̄ dien kleinē walt vogellinen·
wan ſi froͤiwent ſich der blv̊t·
dies vs den eſtē ſehēt ſchinen·
dar vnder ſi wellent rv̊wē diſē kvͤlen meien·
vn̄ ernv́wen ir geſanc vn̄ ir geſchreien·
Jemer dienen ſvnder lon dc iamerlich·
wiſſent ir wer dc hat getan ſeht das bin ich·
Ich wil iemer bliben ſtete·
vn̄ enwil ir niht entwenken·
lônt ſi mir mit miſſetete·
we wes ſol ich dan gedenken·
nein· frǒwe [Ve]nus laſ erbarmē dich·
vn̄ bitte die lieben dc ſi troͤſte mich·
Jemer dienen ſvnder lon dc iamerlich·
wiſſent ir wer dc hat getan ſeht das bin ich·
Ich mv̊s iemer tragē qvale·
naht vn̄ tag vn̄ zallen ſtvnden·
dc tv̊t mir ir mīne ſtrale·
dv́ erfriſchet mine wundē·
die ſtent vn verbundē daſt alzehart·
nv alrerſt ſo iage ich vf der wider vart·
Jemer dienen ſvnder lon dc iamerlich·
wiſſent ir wer dc hat getan ſeht das bin ich·