Vngelich stet vns der mv̊t·
mir vnd dien kleinen walt vogellinen·
wan si froͤiwent sich der blv̊t·
dies vs den esten sehent schinen·
dar vnder si wellent rv̊wen disen kvͤlen meien·
vnd ernv́wen ir gesanc vnd ir geschreien·
Jemer dienen svnder lon dc iamerlich·
wissent ir wer dc hat getan seht das bin ich·
Ich wil iemer bliben stete·
vnd enwil ir niht entwenken·
lônt si mir mit missetete·
we wes sol ich dan gedenken·
nein· frǒwe [Ve]nus las erbarmen dich·
vnd bitte die lieben dc si troͤste mich·
Jemer dienen svnder lon dc iamerlich·
wissent ir wer dc hat getan seht das bin ich·
Ich mv̊s iemer tragen qvale·
naht vnd tag vnd zallen stvnden·
dc tv̊t mir ir minne strale·
dv́ erfrischet mine wunden·
die stent vn verbunden dast alzehart·
nv alrerst so iage ich vf der wider vart·
Jemer dienen svnder lon dc iamerlich·
wissent ir wer dc hat getan seht das bin ich·