VNder der linden·
an der heide·
da vnser zweier bette was·
da mvgent ir vinden·
schone beide·
gebrochen blv̊men vnd gras·
vor dem walden in einem tal·
tandaradai schone sanc dú nahtegal·
Ich kan gegangen·
zv̊ der ǒwe·
do was min friedel komen· e·
da wart ich enpfangen·
here frowe·
dc ich bin selig iemer me·
er kvste mich wol tvsent stvnt·
tandaradei seht wie rot mir ist der mvnt·
Do hat er gemachet·
also riche·
von blv̊men ein bette stat·
des wirt noch gelachet innekliche·
kvmt iemen an dc selbe pfat·
bi den rosen er wol mac·
tandaradei merken wa mirs hǒbet lac·
Das er bi mir lege·
wesses iemen·
nvn welle got so schamt ich mich·
wes er mit mir pflege·
niemer niemen·
bevinde dc wan er vnd ich·
vnd ein kleines vogellin·
tandaradei dc mac wol getrúwe sin·