Toͤhterlin dv solt niht minnen·
e dv kvmest zv̊ vier vnd zwenzec iaren·
wie sol ich der selben rede beginnen·
es minnet noch ein kint bi zwelf iaren·
mv̊terlin·
la das sin·
ich wil iemer leben nach dem willen min·
Tohter da tenderl lenderl lenderlin·
Toͤhterlin gen vs dem bǒngarten·
vnd volge diner mv̊ter lere·
dv solt niht tvmber lúte rede warten·
tůst dv das des hast dv pris vnd ere·
mvͤterlin·
la das sin·
ich wil iemer leben nach dem willen min·
Tohter da tenderl lenderl lenderlin·
Regenspurg passowe vnd wienen·
die mv̊ssen mir von schulden wol gevallen·
da sint kint den wil ich gerne dienen·
lachent si doch bin ich vor in allen·
die sint gůt·
hohgemv̊t·
was ob mir ir etesliche lieb tůt·
Tohter so wis eht gegen den mannen frůt·
Toͤhterlin gedenke an friderunen·
wie dú wart mit einem man zeschalle·
do wolt si mit im zevil gerunen·
do maht er ir dc har zeinem balle·
dc geschach·
ich dc sach·
dc er ir den spiegel von der siten brach·
Tohter da tenderl lenderl lenderlin·