Toͤhterlin dv ſolt niht mīnen·
e dv kvmeſt zv̊ vier vn̄ zwenzec iarē·
wie ſol ich der ſelbē rede beginnē·
es mīnet noch ein kint bi zwelf iarē·
mv̊t̾lin·
la das ſin·
ich wil iemer lebē nach dē willē min·
Toht̾ da tenderl lenderl lenderlin·
Toͤhterlin gen vs dem bǒngartē·
vn̄ volge diner mv̊ter lere·
dv ſolt niht tv̄ber lúte rede wartē·
tůſt dv das deſ haſt dv pꝛiſ vn̄ ere·
mvͤterlin·
la das ſin·
ich wil iem̾ lebē nach dem willen min·
Toht̾ da tenderl lenderl lenderlin·
Regenſpurg paſſowe vn̄ wienē·
die mv̊ſſen mir vō ſchuldē wol gevallen·
da ſint kint den wil ich g̾ne dienē·
lachēt ſi doch bin ich voꝛ in allen·
die ſint gůt·
hohgemv̊t·
waſ ob mir ir eteſliche lieb tůt·
Tohter ſo wiſ eht gegē dē mannē frůt·
Toͤhterlin gedenke an friderunē·
wie dú wart mit einem man zeſchalle·
do wolt ſi mit im zevil gerunē·
do maht er ir dc har zeinē balle·
dc geſchach·
ich dc ſach·
dc er ir den ſpiegel vō der ſitē bꝛach·
Tohter da tenderl lenderl lenderlin·