Swes froͤide hin ze den blůmen stat·
der mv̊s vil schiere truren gegen der sweren zit·
iedoch wirt eines wibes rat·
dú die langen naht bi liebem manne lit·
svs wil ǒch ich den winter lanc·
mir kurzen âne vogel sanc·
sol ich des enbern dest ane minen danc·
187r Die frúnde habent mir ein spil·
geteilet vor dest beidenthalb verlorn·
doch ich ir eines nemen wil·
âne gůt wal so were es bas verborn·
si iehent welle ich minne pflegen·
so mv̊sse ich mich ir bewegen·
doch so ratet mir der mir der mv̊t zebeiden wegen·
Wer es miner frúnde rat·
ia herre wes solt er mir danne wissen danc·
sit ers wol gedienet hat·
da von so dvnket mich sin bîten alzelanc·
wand ich wagen wil dvrh in·
den lip die ere vnd al den sin·
so mv̊s mir gelingen ob ich selic bin·
Er ist alles des wol wert·
ob ich min trúwe an im behalten wil·
des ein man zewibe gert·
deswar dekeiner eren ist im niht zevil·
er ist ein so bescheiden man·
ob ichs an im behalten kan·
minne ich in da misseget mir niemer an·