Swer sich dar an stôsset·
dc dv́ milte kvnne geben·
gebresten vnd ein armes leben·
der ist ein gǒch·
swer si bescheidenlichen hat·
des gelt wirt erschoͤzet·
vnd mit eren vnderweben·
acker wisen vnd reben·
si meret ǒch·
rehte milte an gůte niht zergat·
als ellú wasser vs dem mer·
gewalteklichen giessent·
vnde drin aber fliessent·
also gat des milten er·
wider hein al durh dc iar·
dú rede ist war·
got gab ie gebender hende rat·