Swer ſich dar an ſtôſſet·
dc dv́ milte kvnne geben·
gebꝛeſtē vn̄ ein armeſ leben·
der iſt ein gǒch·
ſwer ſi beſcheidenlichē hat·
des gelt wirt erſchoͤzet·
vn̄ mit eren vnderwebē·
acker wiſē vn̄ reben·
ſi meret ǒch·
rehte milte an gůte niht zergat·
als ellú waſſer vs dem mer·
gewalteklichē gieſſent·
vnde dꝛin ab̾ flieſſent·
alſo gat des milten er·
wider hein al durh dc iar·
dú rede iſt war·
got gab ie gebender hende rat·