Swer nv v̾holner mīne pfligt·
den wil ich warnen es iſt zit·
dc er von liebe ſcheide·
ob er den lib niht ringe wigt·
ſo huͤte er ſich ſwer tǒgē lit·
alſus warne ich ſi beide·
ſo ſang ein waht̾ an der zinne wol·
ſit ich geliebe warnē ſol·
ſo gebe ein lieb vil lieben kvs·
mit nahem vmbevange
vn̄ ſcheide ſich vō liebe alſvſ·
So we mir ſpꝛach dc reine wib·
di wekē tv̊t mir alſo we·
wie wil der tac ſo gahē·
ſi vmbevieng ir frúndeſ lib·
ſi ſpꝛach ſol ich dich iemer me·
mit armē vmbevahen·
vil mīneklichē er ſi vmbevienc·
manig kvs da herzeklich ergienk·
ſi lagen beide dem gelich·
wie ſi die naht mit liebe·
der minne pflegē froͤiden rich·
Der frowē ǒgen wurdē rot·
dc ſi ir liebē frúndes bꝛuſt·
mit trehen gar bererte·
des heldes trúwe im das gebot·
dc ſi vil dike wart gekvſt·
als in dú mīne lerte·
er dꝛvhte ir liehtes wengel an daſ ſin·
er ſpꝛach vil ſvͤſſe troͤſterin·
min herze an dir niht wenken kan·
min trúwe iſt gegen dir ſtete·
er kvſte ſi vn̄ ſchiet von dan·