Swer nach miner lere·
nach liebe werben wil·
der sol frowen ere·
niht haben fúr ein spil·
ruͤmen vnd liegen·
ist werden wiben leit·
doch sol man si triegen·
mit stolzer húbescheit·
Man sol reinen wiben·
iemer sprechen wol·
herzeleit vertriben·
sit man bi in sol·
Es ist niht ein wunder·
dc man die frowen bitte·
si geligent vnder·
vnd gesigent doch da mitte·
swc wir alle niden·
wan sol in wesen holt·
es zimt wol bi siden·
dc vil rote golt·
Man sol reinen wiben·
iemer sprechen wol·
herzeleit vertriben·
sit man bi in sol·
Ob ich hete alleine·
wol tusent meister sin·
der wer doch zekleine·
da ich gedehte hin·
wie dú minne letzet·
ir anegenge ist heis·
den si wol ergetzet·
des frǒwe sih swer dc weis·
Man sol reinen wiben·
iemer sprechen wol·
herzeleit vertriben·
sit man bi in sol·
Walwe zv̊ den brunen·
die sol man haben lieb·
slichen vnd runen
zv̊ zin alsam ein dieb
tvmber man wirt niemer·
niht wan von minnen zam·
wol in húte vnd iemer·
minne ist ein svͤsser nam·
Man sol reinen wiben·
iemer sprechen wol·
herzeleit vertriben·
sit man bi in sol·
Ir kint vnd ǒch ir meide·
vernemt wc ich uch sage·
schoͤne sint vf der heide·
die liehten svmer tage·
dar svnt ir dvr schowen·
vnd lânt 351r vns mit úch gan·
bi den schonen frowen
die wol gemv̊ten man·
Man sol reinen wiben·
iemer sprechen wol·
herzeleit vertriben·
sit man bi in sol·