Swer minnekliche minne·
mit minneklichem liebe habe·
der sol sich des niht svmen so der tag vf gê·
ern twinge sine sinne·
sines herzekliches liebes abe·
dvr dc sin kvnftklichú vroͤide werde als e·
so mag dú frúntschaft wernde wol beliben·
ǒch sint gewis swc man wil vertriben·
dc da dc wol vil lihte an dem ende wirt ein we·
Nv hoͤre trut geselle·
so sprach das wunnekliche wib·
wie nahe mir dc weken an min herze gat·
ich welle sone welle·
so fúrhte ich dc din minne mich
an froͤiden gar verderbe·
dú niht maze hat·
ich wene an mir dú maze welle vnmazen·
wilt dv mich also dike sende lazen·
dc ist ein ding dc mir den lib niht lange lat·
Owe mins herzen herze·
dú wilt min herze brechen abe·
wan e dir iht geschehe so mvͤste mir geschehen·
ein vnuerheilet smerze·
da man niht vúr gebieten kan·
sus stet gegen dir min wille· des mv̊s ich veriehen·
da wart ein lieblich kvs nach herzesere·
dar nach mit rehter guͤte in weis was mere·
da sol man nach gedenken vnd niht gesehen·
Sol ich nv von dir scheiden·
so mv̊s doh vngescheiden sin
getrúwes herzen trúwe der ich han gepflegen·
gegen dir sit minne vns beiden·
geselleklich lieb erwarb·
so hat ih alles trostes mich an dich bewegen·
mich kan niht wan din eines trost getroͤsten·
ich bin den besten ob dc wirt zem boͤsten·
wirt mir von dir niht herzeklicher trúwen segen·
Min froͤide mine sinne·
min liber min leben· min selde gar
hat so din lieb in banden dc ich dir niht mag·
entwenken steter minne·
vnd also steter dc mir ie
din lieb din leit din swere fv́r die mine wag·
nv la mich vrowe varn mit dinen hulden·
mir were ein iar ein tag bi dir von schulden·
nv mag es hie niht mer gesin wol vf es ist tag·