Swer ir lob wil rehte messen·
si ist tvgendericher froͤiden spil·
gv̊ter dinge enheins vergessen·
ist da si ist wunsches hostes zil·
ir liehte varwe kan so glesten·
dc ir minneklicher lib·
schaffet dc sich mv̊s engesten·
gegen ir ellú schonú wip·
da von niden si die besten·
schoͤne vnd ere·
sust selden vrspring dú kan si reine sinne· leren·
da bi vs ir herze blvͤget dú vil svͤsse minne·
Leider ich bin gar verkrenket·
min hoher mv̊t ist ǒch da hin·
min froͤide ist nv in leit versenket·
dc tůt mir dv́ minen sin·
vnd ǒch min gedanke bindet·
swar ich var die volgent ir·
selten man mich froͤlich vindet·
wer sol nv dc wîssen mir·
iamer hat mich ge ingesindet·
von den sorgen·
mv̊s ich verworren in steten rúwen strike· worgen·
wachende gedenke tv̊nt dc vnd in slafe schrike·
Minne wer hat dich geleret·
dc din vil tvgenthafter rat·
hohgemvͤte dem verkeret·
der doch din ist dc missestat·
dv hast minen mv̊t verwendet
an den wunsch wc hilfet dc·
er ze froͤiden ist gesendet·
im wêr doch hie heime bas·
sit sich niender verellendet·
ein gedenken·
zim von der gv̊ten dc im hulfe alles truren· krenken·
minne wis geliche strenge dc lat dich niht svren·