Swas ich nv singe·
dc ist alles vmbe niht mir weis sin nieman danc·
es wiget alles ringe·
dar ich han gedientet da ist min lon kranc·
es ist húre an genaden vnneher danne vert·
vnd wirt aber ein iar vil lihte kleines lones wert·
Wie der eines tete·
des frage ich ob es mit fůge mvge geschehen·
weres niht vnstete·
der zwein wiben wolte sich fúr eigen geben·
beidú tǒgenliche sprechent herre wurre es iht·
wan sols dem man erlǒben vnd den frowen niht·