Svmerwūne iſt hin gekeret·
wint̾ wil begrifen·
liehte blv̊me vn̄ dē kle·
kleine vogelin ſint v̾ſeret·
vō den kaltē rifen·
da bi ſiht man ǒch den ſne·
owe mīneklicher ǒgenweide·
die man ſach vf anger vn̄ vf heide·
die ſtant nv in leide·
dc tv̊t minē herzē we·
Sol min h̾ze fro beſtan·
ſo mv̊s mīne·
mine ſinne·
rv̊wē lan·
Owe ſúfteberer ſoꝛgē·
dv́ min h̾ze twinget·
ach ich froͤideloſer mā·
die trage ich vil vnv̾boꝛgē·
ſit min h̾ze ringet·
dar nach des mir mīne erban·
in weis noch niht was dv́ mīne richet·
dc ſi mine froͤide ſo zerbꝛichet·
ſit min zv̄ge ir ſpꝛichet·
niht wanſ beſte ſo ich kā·
Sol min herze fro beſtan·
ſo mv̊s mīne·
mine ſinne·
rv̊wē lan·
Lieb in h̾zen lieb in ǒgen·
lieb in minen ſinnen·
lieb voꝛ valſche wol behv̊t·
lieb in liebe ſvnder lǒgen·
lieb ich mv̊ſ dich mīnen·
ſwie mir din genade tv̊t·
liebes lieb dv haſt mich mit gewalte·
lieblich bꝛaht in ſoꝛge manigvalte·
liebes lieb nv walte·
liebe gegen mir frowe gv̊t·
Sol min h̾ze fro beſtan·
ſo mv̊s mīne·
mine ſinne·
rv̊wē lan·
Gv̊t gebaren ſchoͤn an libe·
hat div mīnekliche·
kv́ſche in herzen ſvnd̾ wan·
wer geſach an keinem wibe·
dv́ 90v ſich ir geliche·
vn̄ die tvgende moͤhte han·
der ſi pfliget min frowe vnwandelbere·
alle frowen laſſen ane ſwere·
eſ ſint warú mere·
der mv̊s ich ir bi geſtan·
Sol min herze fro beſtan·
ſo mv̊s mīne·
mine ſinne·
rv̊wē lan·
Es iſt dike das geſpꝛochen·
ſwer gewaltig were·
der ſolt doch genedig ſin·
dis reht iſt an mir gebꝛochē·
dv́ vil ſeldenbere·
dú iſt gar gewaltig min·
vn̄ han doch genade da niht fvndē·
wā ir troſt iſt gegen mir gar v̾ſwūdē·
dv́ mir zallen ſtvndē·
tv̊t ir vngenade ſchī·
Sol min herze fro beſtan·
ſo mv̊s mīne·
mine ſinne·
rv̊wē lan·