Sol mir iem̾ ſin ein wib voꝛ allē wibē·
vn̄ ich ir doch niht voꝛ einē man·
wer ſol danne ſende ſwere mir v̾triben·
ob ich des erw̾ben niene kan·
vn̄ ich doch vō ir d̾ gůten niht enſcheide·
weder h̾ze noch dē ſin·
liebet ſi mir da vō das ich ir ſo leide·
ſo weis ich dc ich ir toꝛe bin·
Ich mv̊s dur die v́blen valſche m̾ekere·
miner beſten ǒgenweide enb̾n·
h̾re got dv vuͤge in laſter vn̄ ſw̾e·
durh din ere ſolt dv mich gewern·
das ſi mī v̾geſſen mit ir ſelber leide·
vn̄ der liebē frowē min·
dc ſi got vō ſeldē vn̄ von erē ſcheide·
die vnrehter hv̊te vlizig ſin·
Herre got durh diner liebē mv̊t̾ ere·
leide ſi mir alder liebe ir mich·
in gelas ſo h̾zeliebes nie niht mere·
da vō bin ich manig̾ ſoꝛgen rich·
were ſi mir in d̾ maze als ich ir were·
ſo moͤht es wol w̾den rat·
es enhat niemā ſo h̾zekliche ſw̾e·
ſo d̾ h̾zeleit bi liebe han·