Sich hat maniger hande dink v̾keret·
ſit min frowe twingē mich began·
nv hat aber d̾ meie die heide geêret·
in der gruͤne ſene ich ſender man·
roſen rôt d̾ varwe ich kroͤne·
dú roͤte vn̄ der ſvnnē ſchoͤne·
miner frowen niht gelichē kan·
Ich vant ſi bi manig̾ ſchonē frowē·
do ich die mīneklichē ivngeſt ſach·
do begvnde ich erſt ir guͤte ſchowē·
wie ſi vúr ir aller ſchoͤne b̋ch·
ſam der moꝛgē ſt̾ne lûhte·
vſ vil ſt̾nē deſ mih dv̂hte·
merkēt wūder was an mir geſchach·
Nach hat ſi mir lachē an gewūnen·
minē lib als ich iv wil v̾iehen·
vō mir wolde dú ſele ſin endꝛvnnē·
do ich ſach ſo mīneklichē bꝛehen·
wîſſe zene vſ rotem mvnde·
lebt ich tvſent iar in kvnde·
mvnt ſo rotē niem̾ geſpehen·
Da geſach ich die vil gůten lachē·
do begvnde ir mvndes roter ſchin·
mir ſo lieht ī minē h̾zen machē·
dc ich wāde dc dú ſele min·
ſêhe in dc wūnekliche·
wolgetane himelriche·
do wāde ich vō ir geſcheiden ſin·
Nv hât úwer mīne dur gangē·
ſelig frowe mir h̾ze vn̄ ſin·
nv hat min dienſt niht v̾vangē·
da ich mit ſoꝛge inne galtet bin·
mines dienſtes wil ich ſwigē·
vn̄ wil vf genâde nigen·
deſ lât mich genieſſē kúnigin·