Sich hat maniger hande dink verkeret·
sit min frowe twingen mich began·
nv hat aber der meie die heide geêret·
in der gruͤne sene ich sender man·
rosen rôt der varwe ich kroͤne·
dú roͤte vnd der svnnen schoͤne·
miner frowen niht gelichen kan·
Ich vant si bi maniger schonen frowen·
do ich die minneklichen ivngest sach·
do begvnde ich erst ir guͤte schowen·
wie si vúr ir aller schoͤne brach·
sam der morgen sterne lûhte·
vs vil sternen des mih dv̂hte·
merkent wunder was an mir geschach·
Nach hat si mir lachen an gewunnen·
minen lib als ich iv wil veriehen·
von mir wolde dú sele sin endrvnnen·
do ich sach so minneklichen brehen·
wîsse zene vs rotem mvnde·
lebt ich tvsent iar in kvnde·
mvnt so roten niemer gespehen·
Da gesach ich die vil gůten lachen·
do begvnde ir mvndes roter schin·
mir so lieht in minem herzen machen·
dc ich wande dc dú sele min·
sêhe in dc wunnekliche·
wolgetane himelriche·
do wande ich von ir gescheiden sin·
Nv hât úwer minne dur gangen·
selig frowe mir herze vnd sin·
nv hat min dienst niht vervangen·
da ich mit sorge inne galtet bin·
mines dienstes wil ich swigen·
vnd wil vf genâde nigen·
des lât mich geniessen kúnigin·