Si iehent dc dv́ mīne·
ſanfte lone·
ſwē ſi gv̊teſ willen ſi·
wie wirde ich des īne·
kan ſi ſchone·
ſender ſoꝛgē machē vꝛi·
ia ſi kan·
es alles wan dc eine·
dc ſi mit ir meine
mich niht meinet als ich ſi gemeinet han·
Wie ſol ich gelǒben·
dc dú mīne
helfe wol von ſender not·
ſi kan vꝛoͤide rǒben
vn̄ der ſinne·
ſwen ſi haſſet deſt der tot·
alſe hat·
ſi mich gehaſſet ſere·
nv behalt ir ere·
vn̄ fuͤge dc min noch mit liebe w̾de rat·
Minem ſw̾em mv̊te·
wurde ringe·
ſolt ich die vil liebē ſehē·
owe dc dú hv̊te·
ſolher dinge·
mir ſo lútzel lat geſchehen·
ſehe ich ſi·
ſo were ich minē ſoꝛgē·
verre voꝛ v̾boꝛgē·
vn̄ w̾e ǒch minen beſten vꝛoͤiden bi·