Senender frúndinne botte nv sage ir was ich lide·
dc mir tv̊t ane mâsse we dc ich si so lange mide·
lieber het ich ir minne gelingen·
danne al der vogelline singen·
nv mv̊s ich von ir gescheiden sin·
trurig ist mir al das herze min·
Nv sage dem ritter edele dc er sich wol behvͤte·
vnd bite in schone wesen gemeit vnd lâssen alles vngemvͤte·
ich mv̊s ofte sin engelten·
dc er kvmt den herzen min so selten·
an sehendes leides han ich vil·
dc ich im selbe gerne klagen wil·
Es getet nie wib so wol an deheiner slahte sinne·
dc al duhte gv̊t des bin ich wol worden inne·
swer sin lieb lat darvmbe·
dc kvmt von swaches herzen tvmbe·
dem wil ich den svmer vnd alles gv̊t·
widerteilen dvr sinen vnsteten mv̊t·