Selden wunsch vnd froͤiden hort·
hat dú vi liebe frowe min·
reinú werk vnd svͤzú wort·
hat si swie froͤmde si mir sin·
alle frowen lan das ane has·
die si sehent·
vnd si sahent·
die veriehent
vnd veriahent·
dc in nie noh niemer wib gevallet bas·
Eren sol man ellú wib·
dur si sit si ist so wol getan·
sit ir minneklicher lib·
gar al der werlde pris sol han·
swc ir liehten ǒgen vnd ir grůs·
lúte ie fvndent·
vnd noch vindent·
die entwundent·
vnd entwindent·
sich vs leide· in wart vnd wirt da valsches bv̊s·
Do ir lob von sprvnge flǒg·
gar aller tvgende man im iach·
selde an eren sin niht trǒg·
ein michel wunder da geschah·
al der werlte lob dú do enbor·
hohe strichen·
vnd noch strichent·
dú entwichen
vnd entwichent·
im vnd liesens fúr es vert in iemer vor·