Seht bi dem gv̊ten man dc boͤse merken sol·
so merket man dc boͤse bi dem gv̊ten wol·
wer niht boͤser dinge sone wer niht gv̊ter·
het eva vnd adam niht zebrochen gotes gebot·
vnd het der mensche niht gesv́ndet wider got·
so enwer maria niht cristes mv̊ter·
het got der menscheit niht wc lobes het er danne von menschen zvngen·
nv svln wir danken im siner miltekeit·
vnd siner marter die er dvr vns svnder leit·
des ist vnd wirt im lob ane zal gesvngen·
Nv dc ist von der kranken svnder schulden komen·
dc gotes svn die mescheit at an sich genomen·
dar zv̊ half im dú barmvnge vnd dú minne·
wir alle niemer mer worden los·
maria meit wenne dc dich got zemv̊ter kos·
nv bist dv aller tv́fel twingerinne·
vnd frowe vber aller engelschar· du gotes bist in gotes gewalt gewaltig·
dc hastv von der kranken svnder missetat·
nv hilf der armen schar dú dir geholfen hat·
des dc din ere ist also manigvaltig·
Ob alle sv́nder westen gotes mv̊ter kraft·
so enwurde niemer mensche zwiuelhaft·
ir gvͤte ir minne gotes zorn erwendet·
maria kan si mv̊s si mag si sol si wil·
dem sv́nder helfen si hat aller genaden vil·
swen si mit liebe in irme dienste vindet·
dem hilfet gotes erbermekeit· dú grôsser ist danne aller menschen sv́nde·
ia kemen aller túvel schar vber in zeklage·
e er dem gerehten rihte zv̊ dem lesten tage·
der sv́nder ob dem rehte nah genade fvnde·
So grosse liebe da zesamen wirt getragen·
er moͤhte menschen zvnge niemer volle sagen·
vúr welhen sv́nder maria wil dingen·
si sprichet kint dis sint die brúste die dv svgest·
gedenke lieber svn gewer mich ob dv mvgest·
la mich den sv́ner dir zehvlden bringen·
sich herzen trut dis ist der schoz da ich dich vf want mit kranken tůchen·
gedenke diner scharpfen marter wie der tot·
din menschen herze brach· vúr aller sv́nder not·
si mv̊zen sv́nden dar nah genade sv̊chen·
So nimt der svn sinedel mv̊ter bi der hant·
er sprichet vater min es ist also gewant·
ich vnd min mv̊ter sv̊chen din erbarmen·
gedenke vater wie ich von dem himel kam·
vnd von miner mv̊ter menscheit an mich nam·
dv sehe mich gekrúzet mit den armen·
den tot ich vúr die sv́nder leit· nv schowe herre vater mine wunden·
ich leid an henden vnd an fůzen vngemach·
vnd in der siten da mich tot ein blinde stach·
dar vmbe hat manig sv́nder genade fvnden·